大帝射鹰破波神纪录

ahmoy903

■勒邦占士（23号）抢篮板、传波、射波样样都咁劲，连一线鹰都顶唔住。

东岸决赛周三揭幕，作客嘅骑士靠「大帝」勒邦占士（LeBron James）上演个人骚，以97:89轻取鹰队，为球队先拔头筹兼打破波神纪录。周五进行第二战，骑士就算要继续作客都未惊过啦。（now635台明日8:30am直播）


史密夫28分做板凳王

决心带领骑士再入总决赛争冠军嘅大帝，今场继续一个人孭起成队波，第三节仲搏到唔小心踩中摄影师而扭亲，好彩冇咩大碍；佢全场交出31分、8个篮板同6次助攻，累积个人季后赛第52次单场至少攞到30分、5篮板同埋5助攻，超越曾经51次造出「30+5+5」纪录嘅波神米高佐敦（Michael Jordan）。

而后备落场嘅后卫JR史密夫（J.R. Smith），今场12次起手射三分中八球，破埋队史单场三分纪录。佢个人贡献球队后备嘅全部28分，完胜五个球员夹埋交出19分嘅鹰队板凳。赛后大帝忆起年头球会仲考虑帮唔帮纽约人接收出名麻烦嘅JR过嚟：「我当时话，带佢过嚟啦，我会搞掂佢。」所以话，大帝真系「唯独你是不可取替」。

至于控卫K艾荣（Kyrie Irving），今场铲篮时再整亲本身已经发炎嘅左膝，但佢依然有信心喺Game2落场。相反，落后一场嘅鹰队就冇咁乐观嘞。小前锋D卡莱尔（DeMarre Carroll）喺第四节扭伤左膝，详细情况要等扫瞄结果，但万一呢位攻守兼备嘅硬汉唔出得，鹰队真系大镬嘞。


http://hk.apple.nextmedia.com/sports/art/20150522/19156080