劉偉強有意拍《風雲3》 伊健忙度劇本想執導 衛視電影台為慶祝開台20周年,前晚假圓方戲院舉行《光影20周年》電影巡禮,而由劉偉強執導、鄭伊健主演的經典電影《風雲一雄霸天下》更被選為電影巡禮的關幕電影,前晚劉偉強及伊健亦有出席,其他出席嘉賓還有林建岳、莊澄、何珮榆(Jeana)及Lollipop F。台上劉偉強表示有拍《風雲3》的計劃,手頭上亦有劇本,以及想找伊健做車手,伊健就對司儀范振鋒說:「我要佢親口搵我至當真。」 伊健與劉偉強多年來合作無間,曾合作的經典電影有由漫畫改編的電影《風雲》及《古惑仔》系列,伊健表示計過二人合作的作品有十幾部,更由工作拍檔變成為朋友。剛拍完《全力扣殺》的他,透露忙於度劇本,有意執導筒的他說:「手頭上亦有幾個劇本,當中有自導自演劇本,亦有只做導演的劇本,我要去找投資者,拍戲唔係咁簡單,先要條件是有市場價值。」問到老婆蒙嘉慧(Yoyo ) 可有參與?伊健笑指太太有份聽。 ![]()
|