|
噚晚小鳳姐嘅演唱會，全晚高潮莫過於首唱特別嘉賓鄭秀文（Sammi）出現合唱《隨想曲》，為配合小鳳姐金光燦爛主題同經典波點裙印象，Sammi以一身金色裝束，配以波點高踭鞋現身。 兩人合唱完畢之後，小鳳姐「恩准」Sammi踩上自己條裙嚟個擁抱，又解釋點解邀請Sammi為首場嘉賓：「因為妳叫秀文，我係肥鳳。」Sammi即話：「邊到係呢，妳係『弗鳳』，條腰仲幼過我，我今日闊闊地，好彩睇唔到我條腰，妳真係幾勁。」 Sammi希望似小鳳姐一樣，唱咁多年亦獲得觀眾支持入場欣賞，小鳳姐亦表示終於如願償觀眾心願，邀請Sammi當嘉賓。 為咗答謝Sammi到來，小鳳姐準備咗一份「金光燦爛」嘅禮物，並即時喺手上除下戒指，Sammi尖叫話：「小鳳姐聽晚仲需唔需要嘉賓。」小鳳姐邊為Sammi戴戒指邊話：「呢一隻幫妳戴，妳隻手好瘦，祝願妳永遠幸福愉快，呢一隻請妳轉送畀佢。」Sammi傻笑話：「講呢啲，小鳳姐 。」現場觀眾大叫「安仔」（許志安）。 小鳳姐續說：「大家唔好誤會，呢個佢係只要邊個畀到Sammi幸福愉快健康嘅話，咁妳就轉送畀佢，咁就叫《佢先生》。」Sammi招架唔住話：「小鳳姐真係唔夠你嚟。」獲小鳳姐送上祝福嘅Sammi再獨唱《終身美麗》。   
|
泪王子 发表于 20-2-2014 06:55 PM
时尚天后
本周最热文章
987
0