 好鍾意緊嘅郭富城（城城），今日騎住馬出席尖沙嘴舉行嘅賀歲活動，之後就為醒師點精，大會安排咗三個財神出現，城城一見財神即時逐個擁抱，喻意接財神，佢仲拎住大疊利是笑言：「周潤發係睹神，我係城（醒）神。」然後去到台下大派利是，場面十分熱鬧。 城城有份主演嘅《西遊記之大鬧天宮》喺內地上映3日票房達3億幾，算係非常順利，城城坦言：「對中國電影係一個鼓舞，有咁好嘅演員同導演，有咁嘅成績大家都好開心。」有傳電影將會拍續集，古天樂同黃曉明仲會加盟，城城話：「唔知喎！要睇老闆啦，多啲演員加入都係好事，可以吸引更多觀眾。」咁佢會唔會再接拍續集先?城城話：「我都想繼續做牛魔王，都想有份參與續集，但要睇故事內容點發展。」城城又表示今年會接拍4部電影，又想再做馬主，等愛駒「愛的呼喚」有個伴。 對於資深演員午馬離世，郭富城話：「好突然，我第一部電影《飛越危牆》就係同午馬合作，佢教咗我好多嘢，都20年前，之後就冇機會再合作，佢係一個好有實力嘅演藝人，好有經驗，係電影界嘅損失，祝佢一路好走。」
|
本周最热文章
1734
18