上年同賭王千金何超雲分手,由天堂落入凡間嘅陳山聰,今日接受專訪,剖白對前妻同舊愛何超雲嘅感想,講講吓,仲流下男兒淚。 問到佢有冇同舊愛超雲聯絡,佢一味搖頭以口形回答:「冇。」仲話呢次「世紀甩拖」,係佢人生最大事件。之前又傳出佢拖欠前妻Ponny(楊渡萍)贍養費,佢就好堅決咁否認:「我到今日都仲畀緊,從來冇拖!因為我覺得呢個係一個....曾經我對唔住嘅人,呢個責任係我應該去負。」同時陳山聰亦唔奢求前妻原諒:「感情嘅嘢好難講,我覺得慢慢啦,大家好難即刻做番朋友。」 然後佢又否認爭落好多卡數,陳山聰強調自己有儲錢:「但我唔會打開本存摺你睇去證明。懂陳山聰嘅屋企人、朋友就會知。」亦話自己同超雲熱戀時,「絕對冇」用超雲錢。 講到屋企人,陳山聰就忍唔住開始喊:「人哋點睇我,我唔驚,但係有人會同我屋企人講,佢哋就會好擔心...佢哋就算冇講出口,我都....(眼紅紅)睇到佢哋好擔心...報紙寫嘅,爸爸喺澳門睇完問我:『點解佢哋要咁寫你?』我都唔知點答佢,唯有叫佢唔好睇。」陳山聰繼續拭去淚水話:「咁你個仔係做咗啲嘢,係處理得唔好,影響晒成件事,當我跌低,最無助嘅時候,唔係話可以幫到o架,屋企人好重要。」 同超雲熱戀期間,有傳陳山聰打畀契姐伍詠薇話以後咪搵佢,搞到伍姑娘喺微博宣佈同契細佬「永別」,兩人從此絕交,陳山聰受訪時話:「喺成件事入面,我知道有邊啲朋友係我最放唔低,但我唔想喺度講係邊一個。我知道邊啲係我真正對唔住,真正放唔低,係有一個人。不過,朋友同情侶一樣,都要講緣份。」 其實咁樣講起,陳山聰為咗同超雲拍拖,都「對唔住」幾多人喎。不過Ponny最近上微博,竟然對前夫1月20號一個微博留言按「讚」,唔通Ponny已經冇再嬲陳山聰?咁佢真係一個好大方嘅女人!
|