之前成日大住個肚俾人影到行街買嬰兒用品嘅洪欣,今日終於生咗! 今晚佢喺微博放咗兩張相,分別係同老公張丹峰戴晒頭套喺醫院嘅相,另一張就係同埋囝囝張鎬濂(前名張浩鋒)一齊嘅一家四口照,佢話:「今天,我們家又添了一位新成員--Yannes(張晞彤)很開心她來得及同大家拜年嘍,我們一家四口祝大家新春快樂!龍馬精神!」今日立春,BB踏正馬年出世,真係恭喜恭喜! 洪欣好友蔡少芬兩公婆接受本報訪問時,興奮不已,蔡少芬話:「知道呢個消息超開心!BB女超靚!好多頭髮。好朋友生BB,感覺就好似自己生咁興奮!」 現年43歲嘅洪欣,同現任老公張丹峰結婚4年,終於造人成功,去年9月宣佈懷孕5個月。同年12月,即使肚大如籮臨盆在即,洪欣仍然周圍走為BB置裝,主攻女裝,已透露BB性別端倪。上月中,洪欣又挺大肚出巡,偕老公張丹峰去銅鑼灣食飯,沿途見張丹峰好細心扶住洪欣,sweet到漏。 對上一次洪欣大肚現身,就係上月24號,相約蔡少芬、陳慧珊等好姊妹嘆茶。大概係因為產後坐月唔方便走動,所以洪欣先至出得嚟咁密啦。
|