|
Janice Man今日身穿紅色大露背裝，現身旺角出席護膚品SK-II活動，示範幫男模宋斗煥搽眼霜。問到著紅衫係咪想旺愛情？JM話：「師傅話好，咩都旺啲，事業、愛情都開心。」佢又話計劃農曆年去滑雪，可能去北海道，2月就去歐洲睇時裝周。係咪同啲緋聞男友去北海道先？佢話：「同化妝師朋友，幾對couple。我單拖都可以去，適應咗呢個生活。」 JM又話嚟緊係好年，換言之新一年想唔想擺脫單身行列？佢話：「唔敢諗，不停好希望就脫離唔到，享受一個人，但坦白講鍾意有人陪，唔可以孤獨太耐，冇得強求，要出現就出現。」 緋聞男友謝霆鋒認JM好友，問JM會唔會去「好友」屋企拜年呢？佢就喇：「朋友唔會突然去拜年，我都走咗去旅行。」旅行前去團年等霆鋒煮大餐都得啩？佢話：「唔打搞佢。」怕緋聞？JM直認:「驚!千祈唔好咁講，真係好驚!唔想炒作新聞，做好份內事，緋聞係傳媒畀我，知大家關心我。」 
|
本周最热文章
828
0