型佬梁家辉孖女现身星味特浓

7-1-2014 09:14 AM| 发布者: 佳礼编辑 | 评论: 14|原作者: alancari

摘要: 大家睇明星睇得多，可能已经慢慢觉得惊喜不大，唔紧要，第二梯队，好似三哥三嫂个女苗彤、上山诗钠个女Hilary、黄日华个女黄芷晴、王菲个女窦靖童、阿徐Eason个女康堤(包包)等等等，仲有关礼杰位千金，个个都标致可人 ...

大家睇明星睇得多，可能已經慢慢覺得驚喜不大，唔緊要，第二梯隊，好似三哥三嫂個女苗彤、上山詩鈉個女Hilary、黃日華個女黃芷晴、王菲個女竇靖童、阿徐Eason個女康堤(包包)等等等，仲有關禮傑位千金，個個都標緻可人笑容甜美，遺傳晒父母優良基因，令人留下深刻印象。

上述幾位曝光率頗高，大家亦較為熟悉，至於呢位圈中型佬兼廿四孝老公/爸爸——梁家輝，都有一對孖女，分別叫做Nikkie同Chole，轉眼今年已經21歲喇，Nikkie仲有個男朋友仔，不時擺相上網，當然貼得最多，仲係佢同爸爸嘅sweet sweet相啦。

呢個廿四孝好爸爸，今日拖住老婆江嘉年喺機場出現，佢哋唔係出埠度假，而係新年假期結束，孖女Nikkie同Chole要返加拿大開學，家輝同老婆去送機。

下午兩點，家輝同老婆、一對孖女4人現身機場國泰櫃位，雖然孖女係圈外人，但係同爸媽一齊戴上黑超，成家星味十足，難怪引來市民眼望望。雖然一對孖女已21歲，婷婷玉立，但家輝依然照顧周到，不但送機，又幫乖女辦埋登機手續。家輝十指緊扣拖住老婆，送孖女到閘口，呢一刻，男人味特濃。入閘前Nikkie同Chole分別都同爸媽擁抱，感情要好。

送完兩女入閘，家輝笑言：「拍完戲咪忙湊女囉。」提到劉愷威同楊冪聽日喺峇里結婚，家輝話：「我識佢老竇喎，結婚咩？聽聞佢哋行好耐，最開心係丹爺（劉丹），祝佢哋百年好合永結同心同早生貴子。」有指楊冪有BB，家輝笑稱：「咁咪好，嗱嗱聲，唔使搞咁多嘢，等丹爺可以早啲抱孫。」

此外，周慧敏同古巨基助手女友Lorriane一早離港出外工幹，雖然時間早，但周慧敏依然化好淡妝精神奕奕，大方向記者微笑揮手，而熊黛林就同助手飛往上海工作。