 《掃毒》首映禮噚晚喺圓方舉行，導演陳木勝、演員張家輝、羅蘭都有出席，而錢國偉、陳宛蔚、文凱玲、寸嘴Barbie夏尉喻、江若琳、鄭少秋、鍾鎮濤等嘉賓亦有到場支持。《掃毒》喺內地上映4日，票房收近一億人民幣。適逢噚日係張家輝49歲牛一，大家即場為家輝慶祝，楊受成亦有現身為家輝慶祝，戲中扮演家輝母親嘅羅蘭，就同家輝錫面賀壽。 戲中變性人Poyd未有到場，現時泰國局勢緊張，問到家輝有冇問候對方，家輝話：「冇問候，佢都唔係善男信女，我意思係佢好安全，唔會係街流連。」 家輝喺戲中同Poyd有激吻戲，佢話拍之前心中掙扎咗一個星期，家輝話：「知道佢底蘊，尊重佢界別，但始終人係感情動物，所以徹底拍此戲，心中畢竟會有衝擊，我冇攞番出黎講，費事好似好嫌棄人哋嘅界別，之後我都有睇AV，清晰番我嘅取向。」 張家輝太太關詠荷噚晚冇捧場，家輝之前同Poyd為雜誌影咗輯親密相，家輝主動問太太係唔係「火都嚟」，關詠荷直認「嚟呀！」。噚晚家輝話：「太太都有話最好唔好啦，我衡量過識得分寸。」家輝憑《激戰》喺亞太影展中獲提名男主角，家輝話好開心，但覺得齣戲有太多元素，所以自己唔諗太多。 
|
本周最热文章
1211
7