 台灣娛樂圈近期喜事重重，除咗吳建豪及王力宏先後成為「老襯」外，36歲台灣女星徐熙媛（大S）今晚喺微博終於宣佈有喜，大S貼咗張大肚相，並留言話：「感謝大家的祝福！我們一家有三口了！感恩～」 至於大S老公汪小菲就留言：「辛苦了老婆，孩子一定呼吸的了北京的空氣喝得了台灣的水。謝謝大家。」 而大S胞妹徐熙娣（小S）亦喺微博留言恭喜家姐：「我最親愛的姐姐,恭禧（喜）你,你一定會生出一個健康可愛的寶寶! 」 剛與老公汪小菲度過結婚三周年紀念嘅大S，早前屢傳懷孕消息，尤其係當胞妹徐熙娣（小S）因為代言老公許雅鈞有份投資嘅麵包店涉入香精事件，接着許雅鈞及許父又捲入商事罪案中，小S亦曾接受調查，認真倒楣﹗當時就爆出大S疑似懷孕消息，令外界覺得佢護妹心切，先轉移視線，佢同老公汪小菲曾被目睹喺台灣書店睇育嬰書。 其實大S早前已默認有喜，只係可能未足三個月所以不便透露，除咗被目睹睇育嬰書外，大S及汪小菲亦被目睹喺泰國出現，當時大S戴住墨鏡及口罩，身穿寬鬆白衣，但仍見腹部微隆，當時佢同老公到四面佛廟祈福，有指兩人造人成功，故親到廟宇還神。 大S貼相未夠一小時，已有超過合共10萬網民留言及轉發，紛紛向呢位準媽咪送上祝福﹗
|
本周最热文章
1732
18