 之前王維基重金禮聘無綫一眾綠葉藝人過，如駱應鈞、艾威、張松枝、陸駿光、劉玉翠、冼灝英等等等等。當時有人譏王維基只會請甘草演員過檔。牡丹雖好都要綠葉扶持，噚晚政總上映《半澤直樹》就知道，綠葉有幾正。 其實除咗上述幾位，仲有一個叫朱婉儀，又係講名未必知，一睇樣又係「啊!原來係佢!」2000年落選港姐，演藝學院畢業，被派演角色都係OL、秘書、八婆、鳳姐等、馬姐等等。令人較有印象係《鐵血保鑣》演麥長青老婆曾艷娥。但原來佢都好鍾意玩cosplay，更曾以Cosplayer身份參賽。如今香港電視不獲發牌，朱婉儀亦同其他藝員一樣，一齊上街，留守政總，向政府黑箱作業說不。 咁當日朱婉儀點解要離開無綫？因為兩個字:尊重。日前佢聯同一眾藝人上咗《娛樂審死官》，大談心聲，朱婉儀更激動落淚，佢話:「最尾一次《巴不得…媽媽》慶功，因為收視都唔差，我嗰次真係忍唔住，我同監製潘嘉德講，我走嘅最主要原因，唔係我做唔到嘢，而係點解咁多年，我喺呢間公司，我冇見過一張海報有我個名。呢個係一個好好大嘅問題，因為你作為一個藝人，你冇一個名喺張海報度。你知TVB係全球賣埠，我只係想有一張海報有自己個名，但我原來發現，你係冇嘅，你係冇嘅，但唔代表我冇喺個劇入面演出……」說時朱婉儀已經哽咽了。她續說:「點解喺坊間有人識你，但喺自己公司嘅海報上從來冇我個名。當時Tommy(梁家樹)都喺度，我同佢哋講，呢個係我走嘅原因。我身為一個演員，我連自己個名都唔可以俾人知道，咁我作為一個演員，仲有乜嘢意思呢？我努力去做一啲嘢，係冇(名)嘅，但係坊間係叫得出你劇裡面個名，話你做得好好，佢哋真係講得出你做過乜嘢劇。」 資料來源：蘋果日報 以下片段取自有綫電視Now TV的《娛樂審死官》，聼了真令人心酸 
|
本周最热文章
900
4