|
![](http://static.apple.nextmedia.com/images/e-paper/20130809/large/1376056085_6cfe.jpg)
噚晚新城喺會展搞嘅音樂會,邀請咗喺內地hit到爆嘅《中國好聲音》歌手包括鄭虹、李維真同趙露做嘉賓,香港歌手就有鄧紫棋(G.E.M.)、RubberBand同小肥等,全部都係唱得之人。
不過小肥獨唱嗰陣甩嘴要重唱,同趙露合唱《征服》嗰陣仲俾人哋嘅歌聲壓倒。好彩壓軸出場嘅G.E.M.完全冇怯場,仲同聲底雄厚嘅鄭虹合唱時擦出火花,掀起高潮。
身穿白色短top露腰嘅G.E.M.上圍激凸,佢話套衫係唱片公司幫佢安排,問事前有冇問過男友林宥嘉(Yoga)?佢話﹕「我都係啱啱知,叫佢自己睇報紙,公司都唔會俾我太Sexy。」
其實Yoga應該早就見過佢全相啦,不過G.E.M.面紅紅話﹕「梗係唔係啦!」佢話反而有興趣睇男友嘅寫真﹕「點會睇過佢Body,連游水都未游過,佢好專心做音樂,睇死佢都唔會影(寫真)。」
G.E.M.對佢同Yoga嘅關係繼續耍太極,但Yoga遲啲可能會嚟香港出席新城國語力頒獎禮喎,唔知到時佢兩個會唔會又拖手呢?佢就話﹕「睇吓到時條裙長唔長啦。」
|
|